我記得前幾年，耐唔耐電視都會做吓廣告提醒香港人要提升服務質素，呢排反而唔係好覺有呢類宣傳。唔知係咪因為呢個原因，我有啲覺得商戶嘅服務質素每況愈下，尤其是啲大牌子。
前三兩個月，我響時代廣場經過嗰間出名賣織皮皮具嘅舖頭，身痕想入去睇吓有冇鍾意嘅銀包。我當時見到面口嘅玻璃門係閂咗嘅，但係有位西裝友企響舖頭入面嘅門口位置。我都未行到埋去，就見到有疑似內地同胞想推門入去，但俾嗰位西裝友頂住道門推唔開。同胞望一望嗰位人兄，位人兄只係手指指玻璃門後嘅一個牌，之後就冇理個同胞，而同胞就響門口靜靜哋等。如果我冇理解錯，個牌應該係寫住因為人流控制所以要啲客人響門口等之類嘅說話。我再望一望舖頭入面，以為會人頭湧湧啦 - 錯哂，人丁不知幾單薄。
本來我對於人流控制呢個做法冇乜異議，但係最近唔知啲舖頭係咪要造吓勢，明明入面一啲都唔逼，都唔俾人入去，個個響門口楝篤企。可能啲名店個姿態係，嗱，入得嚟梗係要有人招呼你啦，咁我哋得幾丁友，咪只可以招待幾個客囉。換句話講，齋參觀嗰啲可以過主喇，除非你大把時間唔旨在啦。
你要擺款，OK冇問題，呢啲係你啲marketing。但係你個「實Q」夠膽死手指指個牌就唔理人，唔好再臭串啲？雖然我好睇唔過眼啲唔知點解咁有錢嘅內地同胞嚟香港消費扯高哂物價，但係佢哋都係消費者，唔通連基本尊重都冇？你作為企門口嗰個，就算唔可以一路楝響舖頭門口外親自同有意入去嘅客人解釋要人流控制所以要佢稍等，都應該開門行出嚟講呢番說話，而唔係手指指咁，一啲禮貌都冇。
另一次扯火經驗發生響我爸爸身上。我當時唔在場，但相信佢冇誇張。話說早前爸爸將我隻錶攞番去舖頭做保養（今次呢間係個盒紅色﹑經常用豹做題材嘅牌子），舖頭做完個保養，通知我爸爸可以攞番隻錶。咁前兩日爸爸就去間舖頭啦，仲要係北京道嗰間大舖。當時落緊微微雨，門口冇人排隊。爸爸想推門入去嘅時候，門口個哥哥頂住道門，只係剩番一條半個身位嘅罅。簡單啲講，就係個哥哥問我爸爸有咩貴幹，咁我爸爸話要攞錶，諗住咁就可以入舖頭，唔駛再淋雨啦，點知個哥哥都係唔開門，再繼續問我爸爸有冇單據。爸爸話有，佢都死唔開門，一直到我爸爸俾咗張單佢，等佢驗屍咁驗咗一輪，先至有得入去舖頭入面，攞番一樣屬於我哋嘅嘢。
呢啲係咩服務態度？就當門口位哥哥係要負責人客分流，所以要知道個客人想做咩。就算係咁，係咪應該開門請個客入咗去先講呢？我唔知呢啲係邊個部門負責制訂嘅事，淨係覺得一定唔係本住以客為上嘅心態去執行。
可能時移勢易，以前係要個客賓至如歸先係大牌子名店嘅作風。依家？你愈覺得自己係乞緊佢賣嘢俾你，嗰間就愈有機會係名店。小妹見識雖然少，但係無論去歐美定日本，都冇遇到過啲咁嘅事（最多都只係響哥哥微笑地叫你稍等之後等咗勁耐，等佢慢條斯理咁服侍完個客先理你）。如果唔係因為香港啲嘢響港幣貶值同各樣因素影響之下都仲係算平，我絕對諗唔到其他原因香港可以繼續話自己係購物天堂。
我依家真係寧願上網買都唔想受啲舖頭氣﹗
