一件未解決的事…

(image from google.com)

你有冇諗過，你係咪真係對你最關愛嘅人最好？

曾經有一段時間，我覺得我對我公司啲客同同事最好。無論佢有幾無理取鬧我都唔會發佢脾氣﹑唔會當面拒絕佢嘅要求﹑亦唔會指出佢有幾白痴。同樣嘅耐性，至少屋企人就好似冇享受過喇。姑勿論你有幾多原因去justify點解要對工作上接觸嘅人咁好，你都應該justify唔到，點解你唔係對你最親嘅人咁好。

有時候都幾內疚。每一日，屋企人只分到你當日用剩嘅耐性同正能量 。呢一刻好有心機同佢哋分享你嗰日做咗啲乜見過邊個，下一刻可能佢哋問多一句都嫌煩，幾乎係條件反射咁一句"dud"埋去。有時會諗，冇辦法喎，人總有心情唔好嘅時候，而呢啲時候通常響身邊嘅咪就係屋企人囉，只有響屋企對住屋企人先可以「唔扮嘢，做自己」，因為佢哋先有咁樣嘅包容同體諒。

如果你愈愛嘅人你對佢愈好，咁照道理你應該只會黑啲三唔識七嘅人面，唔會黑你阿爸阿媽面（有仇除外）。所以如果事實情況剛好相反，原因除咗你只敢老奉你最親嘅人之外，仲有咩呢？

有可能係因為，只有咁埋身咁親嘅人，先會響你最放鬆嘅時候出現響你身邊。人愈大，就愈多怪脾氣同習慣，萍水相逢嘅人未必有機會見識到，但係你臨瞓前一刻仲同你爭緊廁所用嘅屋企人就受哂喇。

我發現我都開始有啲無定向嘅喜好。例如我做緊正經嘢（正經嘢包括寫blog）嘅時候唔鍾意人同我講嘢 ，因為咁樣會令我分心。但係當我過咗個concentration span，我又需要撩吓人玩或者做吓第二樣嘢，搞一輪先可以重新專心番做番正經嘢喎。咁身邊人自不然就覺得，嘩，明明頭先你響度同朋友傾電話，轉個頭我問你兩句你好話我同你講嘢令你分心？你都好大細超啫…又或者係自己唔知點解凡係唔100%肯定嘅都寧願答「唔知」或者「唔記得」，令到身邊人心情煩躁（十問九唔知喎，你唔躁我都躁啦），查實係因為自己成日形住，如果有人因為我某年某日吹水唔抹咀之後信以為真，唔知做咗啲乜出咗事我咪好大罪？等等等等…

呢啲嘢真係唔講唔知，有時甚至係自己都唔知。林林種種加加埋埋，結果就係自己最關心嘅人往往受最多自己嘅閒氣。點樣改善我都未諗到辦法，我要繼續諗吓諗吓﹗歡迎大家提供寶貴意見，無酬。

真的喜歡你．．．

我指做手作。

我記得2010年其中一個目標，係學一樣嘢。我揀咗手雕橡皮圖章，冇乜特別原因，純綷係見到教整橡皮圖章嘅書，好似幾得意，最重要係好似唔係太難，就即管試一試。買完一輪材料，手震震咁雕咗第一個章，肉酸到不得之了，見到條線都想像到當時隻手有幾震。不過又真係幾好玩喎，整完之後又好有滿足感，從此，就掉入咗手作嘅深淵喇！

雕吓一個，雕吓又一個

雕完嘅圖章，通常都用嚟做咭﹣生日咭又好，聖誕咭又好，靚唔靚都好，起碼獨一無二，只此一家。只恨我唔識畫公仔，要自創圖案有難度，不過唔理咁多，一於繼續雕！

本本都係自己整㗎

如果冇記錯，開始雕印仔冇耐，就跟一個朋友學整簿﹣即係自己整個簿皮，再加一疊紙，然後變成一本簿。呢位朋友，識佢嘅時候已經有「手工王」嘅美譽，佢嘅一雙巧手，做手工叻之餘，寫出嚟嘅字亦靚到你嘩嘩聲。跟呢位朋友學咗Japanese binding，coptic binding同buttonhole binding。整完啲簿到依家都唔捨得用呀。有興趣嘅朋友，可以上佢個網址睇吓，佢仲有開班，仲有得學㗎！

剛開始上呢啲手作堂嘅時候都要搵朋友一齊柴娃娃一下，但係好快已經唔需要人陪喇。因為響手作嘅世界，只有你同你面前做緊𠴱一件事，根本就唔得閒傾偈，亦唔想分心。𠴱個state，好正。

物以類聚，整咗印仔同簿之後，又有人介紹整皮革小物（我簡稱佢做「皮東東」，因為唔一定係細細件嘅）。唔駛諗，即去學！

好快就發現，整皮東東係另一個天堂。

自從整皮東東之後，好多嘢都唔駛買喇

對我嚟講，皮東東有一種好特別嘅吸引力。整皮好多時都唔需要好大型嘅工具輔助，相對地比較容易響屋企整。另外又可以配合布料做裡，小配件買買埋埋都算容易收納，成件事都好似好理想。

雖然依家算有幾張刀，但係冇張利。我覺得，我依家響手作海度尋找緊我個一生最愛（笑）。

除咗好玩呢個元素之外，我覺得做手作改變咗我嘅價值觀。當你試過從冇到有咁變一樣嘢出嚟之後，你會感受到一種算得上係自我陶醉嘅滿足感。成件事都係你自己嘅，每一個元素要係點都係你自己嘅選擇。思前想後再埋頭苦幹一輪變出嚟嘅作品，我覺得，我真係「愛」佢㗎！

無論係彷彿靈魂出竅地專心𠴱個過程，定係全世界只得一件嘅特性，都令我覺得，用錢就買得到嘅嘢其實唔係好矜貴。又或者咁講，橫掂都買唔起𠴱啲天價嘅限量版，自家製一個別注版過吓癮都好吖！

正經啲講，其實好享受將心思注入一件作品嘅過程。我硬係覺得，用心做出嚟嘅一件手作小物係真係有靈魂嘅。同樣係手造嘅，你係睇得出亦摸得到佢係一件求其地俾人造出嚟攞去賣嘅東西，定係一件心血結晶。況且用自己手造嘅東西做禮物送俾人，就算唔夠靚／貴，至少夠用心同夠特別，冇得輸喎！

你睇吓啲參考書幾精美！

一切從開心出發

某年某月某日，同一個好朋友傾偈嘅時候，佢介紹我睇一篇龍應台嘅文章，標題係「給河馬刷牙」。我記得我睇完﹑抹乾眼淚之後，將呢篇文print咗出嚟，貼咗響office。我同自己講，我要好好記住佢講嘅說話。

文章裡面，龍應台同自己個仔講︰「在現代的生活架構裡，什麼樣的工作比較可能給你快樂？第一，它給你意義；第二，它給你時間。你的工作是你覺得有意義的，你的工作不綁架你使你成為工作的俘虜，容許你去充分體驗生活，你就比較可能是快樂的。」


然後佢仲話︰「當你的工作在你心目中有意義，你就有成就感。當你的工作給你時間，不剝奪你的生活，你就有尊嚴。成就感和尊嚴，給你快樂。 」


當眼淚流出嚟嘅時候，我肯定自己當時唔多快樂 ，因為我冇時間去做自己鍾意做嘅嘢，一切都係圍住工作轉，經常要加班之餘，亦控制唔到幾時加﹑幾時唔加，時間根本就唔係自己嘅。嗰段時間，響我個標準嚟講已經稱得上係營營役役，係生存以上﹑生活以下。


有時人真係需要當頭棒喝。雖然未至於當頭到要立刻劈炮唔撈，但係暗地裡都已經將心中個priority list重新洗牌，然後同自己講，要堅守自己嘅底線。


我從來都唔相信，一個負責任嘅員工等同一個24小時standby嘅員工。曾經有一個舊老闆同我講，如果你係一個專業嘅律師，你應該願意為工作需要而犧牲自己嘅私人時間。講得好…廢﹗首先，咩為之工作需要先？如果任何工作需要我都要仆到番嚟做嘅話，我同奴隸／賣身有咩分別？而你又點知我私人時間要做嗰件事，唔緊要得過你個「工作需要」？一個好老闆，會幫你好好守住呢條「OT線」，因為佢識得尊重你係一個有自己生活同選擇嘅人。如果你老闆開口埋口就同個客講，話會「24小時隨時為你服務」，而你先係真係做嘢嗰個，朋友，轉工啦（除非你袋份糧係肥到用嚟收買你所有時間，咁就冇嘢好講喇）。


好多人都會覺得自己冇得揀，覺得呢個世界上冇咁筍嘅工。係㗎，冇咁著數嘅事㗎。你要人工高、公司名要夠響、工時要短、老闆又有人性 ﹣ 呢啲咁正嘅工，真係唔存在㗎。所以都係嗰句，要取捨囉。唔係個個都咁好彩，份工本身可以令自己好開心。但係一般普通人，都可以追求一份容許你做令你開心嘅事嘅工，一切都視乎你捨唔捨得放手，用賺少啲錢去換早啲收工，騰番啲時間出嚟做你認為重要嘅事。如果時間真係金錢嘅話，咁調番轉諗，收少啲錢咪可以有多啲時間囉！


乜嘢對你嚟講最重要，只有你自己先知。你要點樣過你嘅人生其實與我無關。只可以講，時間一日一日咁過，有啲嘢依家唔做，遲啲唔會有得補番。你錯過同屋企人、朋友相處嘅時間，你唔理唔理嘅健康，你一直冇實踐嗰個夢想 ﹣ 有一日，當你搵夠賺夠嘅時候，可能已經過咗、冇咗，到時候就算有人可憐你，都唔會有人賠番俾你。


響呢個郁啲就用錢嚟衡量你掂唔掂嘅拜金社會，要逆向咁用錢換時間都需要唔少勇氣。但係如果依家唔勇敢啲去爭取做令你真正開心嘅事，十年八載人老珠黃／中年發福之後，先至發現自己唔知做過啲乜（淨係數得出自己買過啲乜）嘅話，變成mid-life crisis，咁又何必呢。


人係好容易迷失嘅，共勉之啦！

上一站 ﹣ 瑞士 Interlaken

剛剛同屋企人去咗兩個禮拜歐洲，響巴黎米蘭呢兩個朝聖地中間加插瑞士嘅Interlaken因特拉肯 （呢個係瑞士國家旅遊局譯嘅中文名，有香港出嘅旅遊書譯佢做煙特勒根），個人認為，係成個旅程嘅亮點，令我最不枉此行。

旅行之前，我對瑞士嘅認識只限於天氣報告會提起嘅蘇黎世同日內瓦。屋企人話想去瑞士，男友就強烈推介Interlaken，我當時心諗，聽都未聽過喎，邊樹嚟㗎？但係既然佢拍心口話靚，就即管去吓。

咁到底Interlaken響邊度，佢又有咩好呢？

地理上，Interlaken響少女峰地區，位處於兩個湖中間（詳情有興趣嘅話可以去瑞士國家旅遊局嘅網頁研究吓），地方唔係大，火車站得Interlaken West同Interlaken Ost（即係east咁解）兩個咁大把。加一條主要大街（基本上係直路）接駁東站同西站，係咁多。大街上有啲舖頭仔，賣吓朱古力同手信，不過唔好睇佢地方細細，𠴱度有間賭場，驘到大錢嘅話你可以掃哂啲名錶走（有啲舖頭仔有賣珠寶首飾名錶同名牌㗎）。

中間有啲雲𠴱度就係少女峰喇

天氣好時（我去咗3日，日日都好），響大街上一眼就望到少女峰（Jungfraujoch）。少女峰係阿爾卑斯山山脈上嘅其中一個山峰，根據維基百科，佢係同名山脈斷層嘅最高峰。呢個山，坐火車就上到㗎喇！

話說100年前有條友開咗一條火車線上少女峰（Jungfraubahn），從此以後，輕輕鬆鬆坐響度就上到去呢個海拔3454米（即11333尺）高嘅少女峰啦！Interlaken Ost站係上少女峰嘅起點，車站有電視直播山上天氣情況，你可以到時睇住直播決定上唔上山。點解唔可以上咗先算呢？因為呢程火車都幾貴㗎。火車飛來回要大約180瑞朗（我去𠴱時1瑞朗兌緊9蚊港紙），車程仲要5個半鐘（未計中途逗留時間），所以可以揀的話，梗係等山上天氣好先上啦。

Kleine Scheidegg中途站，靚得佢吖

由Interlaken Ost出發，可以選擇經Lauterbrunnen或者Grindelwald上去Kleine Scheidegg，之後轉乘少女峰鐵路上少女峰站。好似有少少複雜？唔駛慌，Interlaken周圍都有呢程火車嘅資料單張（全彩色，好似一本書仔咁），單張上有詳盡嘅火車時刻表。雖然要轉幾次車，但係除非你四圍貢買嘢食搵厠所，否則係唔會miss嘅。就算真係miss咗，下一班車30分鐘後會再開，仲開得好準時添。

一路上，可以用「風光如畫」嚟形容。綠油油嘅山坡上一間間傳統屋仔，間唔中會見到條頸掛住一個大啷啷（牛鈴）嘅瑞士牛牛同羊羊，令你即時想唱番首"yor-yee-yor-yee-yor-hee-hoo"飄零燕應吓景。係上咗少女峰鐵路之後，反而會冇景欣賞，因為有一段係穿過個山嘅隧道嚟，黑麻麻，可以眠一眠。

成7個半瑞朗一個㗎！

上到山上，有觀景台同餐廳，你可以透過玻璃欣賞少女峰峰上嘅景色。再唔係，你亦都可以行出去同個山頭埋身肉搏。宣傳單張話有好多嘢可以玩（例如滑吓雪），但當然一切睇天氣做人啦。我去𠴱日，一路上都好好天，但係山上原來落緊大雪，真係估佢唔到（山下氣溫有27、28度），除咗凍到變雪條之外，視野亦都好有限，一片白濛濛。所以我係咁易出去行咗幾步過吓癮就算喇。番到入觀景台，可以買吓手信，有時間仲可以寫張postcard寄俾朋友（自己都得）。響山上寄的話（手信舖賣埋郵票），個郵截寫住“Jungfraujoch 3454m”，又靚又有紀念價值！

話時話，瑞士人都幾識做生意，除咗手信舖有郵票賣之外（雖然行過兩步有郵局），food court竟然有得賣杯麵，仲要係辛辣麵添！個個行完出去凍到牙關打顫，入到嚟有個熱辣辣嘅麵，𠴱種感覺真係好幸福，所以就算係貴到阿媽都唔認得，都乖乖俾錢。食完之後，我媽子形容，個身係由入面（即係條食道同個胃）暖出嚟，當堂舒服哂，貴都抵呀！

簡單嚟講，山上有得玩、有得食，玩到夠皮就落山。如果上山時經Lauterbrunnen，落𠴱時可以揀經Grindelwald，叫做有啲變化。

Grindelwald同Lauterbrunnen相類似，都係一個簡單嘅小鎮（即係一個火車站加一條大街），夏天嘅時候，除咗手信之外好多舖頭都係賣行山用品。其實Grindelwald同Interlaken距離好近，行落去都得。雖然我當日係搭火車落去嘅，但係根據可靠情報，行都應該係兩個鐘嘅事。一路行，仲可以一路唱飄零燕，一路望吓啲牛羊食草，聽吓佢哋身上掛𠴱個牛鈴發出嘅啷啷聲，享受一下簡單而寧靜嘅美好。

呢片少女峰地區，有好多小鎮可以俾你住（例如Lauterbrunnen同Grindelwald)，而除咗少女峰鐵路之外，唔同地方都會有啲纜車、行山徑之類嘅嘢俾你玩，亦有其他山峰俾你上，所以你想玩三兩日又得，玩足一個禮拜亦冇難度。

唔似得去大城市，去Interlaken，Lauterbrunnen呢啲地方，冇景點要chur，亦唔會驚蕩失路，成個人可以真真正正咁放鬆一吓。名符其實係好山好水，抬頭係大片藍天白雲，湖水／河水都清澈見底，地上唔係樹就草，唔係草就係花。石屎只限於車行嘅馬路，家家戶戶都將家門種滿花草。個天9點都未黑齊，冇見過人趕時間。身處其中，你會真正感受到，個世界其實好大，仲有好多唔同嘅生活方式同態度。呢度當家作主嘅係簡單嘅自然美，索入去𠴱啖清新嘅空氣，響香港有錢都買唔到。

Lauterbrunnen一隅

總括來講， 下次去歐洲，可以的話都會經一經瑞士。其實瑞士同法國、意大利、德國同奧地利接壤，既然坐得咁多個鐘頭飛機去歐洲，如果本身已經諗住去呢四國其中一度（或幾度），點解唔去埋呢？

to blog or not to blog, that is the question

最近見啲姊妹們寫blog寫得好開心，搞到我又心思思想再寫。

一路都未動筆嘅原因，係我唔知有咩好寫。我唔係格價/扮靚專員，又唔識飲唔識食，去完旅行都唔會記得去過邊﹑食過啲咩，加上一日大部份時間都心不在焉，個腦亦唔多鍾意記嘢，所以唔慌會留意到或者記得身邊發生咗啲咩好笑嘢，寫番出嚟同普羅大眾分享。咁，我個blog，有咩存在價值呢？

唯一諗到嘅係，我想湊熱鬧。

熟悉我嘅人會知道，我冇本事娛樂大眾，無論幾好笑嘅笑話，響我把口講出嚟都會dead air，八卦嘢又唔敢講因為驚死得罪人，所以，來去幾個朋友圈子嘅聚會，我都係常客主腳，但係通常都冇乜貢獻唔多嘢講(不過一定識陪笑)。可能因為我太keen，所以就算冇乜貢獻，我呢隻腳都未俾人飛起。講咗咁耐開場白，我只係想帶出一個我嘅性格特點，就係我鍾意湊熱鬧﹗

就係因為咁，我決定重新寫番blog，你寫我又寫。

先旨聲明，我呢個blog有3不寫︰

第一﹑食評唔寫。因為我對食真係冇咩要求，唔會咁神心山長水遠尋訪人間美味，就算真係去咗都好大機會唔會記得間嘢響邊﹑食過啲咩同埋佢好唔好食。如果你係鍾意睇食評，又睇厭咗open rice嘅話，可以去吓呢個blog 。

第二﹑扮靚心得唔寫。因為真係冇。以前睇開一個叫Michelle Phan嘅女仔響xanga教人化妝覺得幾好睇，都有follow，但係佢好似紅咗之後就冇乜新update，反而我個扮靚專員姊妹就剛剛開blog，佢介紹得嘅我可以拍心口話必屬佳品(例如佢介紹嘅eyelines我一直追加)，所以你不如睇佢個blog好過。

第三﹑肉麻骨痺私人感情事唔寫。原因正常人都會明，我實在太明白嗰啲「我baby今日帶我去high tea，佢真係好錫我呵呵呵」再附加兩打佢同佢baby嘅大頭親熱相係有幾咁令人毛骨悚然，己所不欲當然勿施於人，放心。

睇完呢3大戒條之後，可能你已經覺得我個blog唔會有好嘢睇，所以你會過主。冇所謂，我唔會有hard feeling嘅。我一直覺得寫blog都係西人口中嘅oral diarrhea，純粹個人意見發表，唔係用嚟普渡眾生的，唔係你杯茶都好正常。我寫，只係因為我想寫，到有一日internet向用戶收垃圾處理費嗰時，我自會剷哂佢。

講咗咁耐，即係我會寫咩呢？我…

未諗到。萬事起頭難(呢個唔係男士專利)，所以點都要開咗個頭先，之後點繼續，到時先算啦。