忽然想喊日

每個月總有啲日子情緒特別怪。除咗「忟忟憎憎日」之外，有時，我仲會有「忽然想喊日」。

「忟忟憎憎日」固之然容易理解，相信有同感嘅女性，甚或乎男性朋友們都唔少。之不過我好懷疑，有幾多人會好似我咁有「忽然想喊日」？

講到「忽然想喊日」嘅厲害之處，係真係好忽然，同好想。無論腦海中嗰樣嘢係幾雞毛蒜皮芝麻綠豆都好，話咁易就感動到鼻酸，要即時諗第二樣嘢，眼淚先至唔湧出嚟。

遇著「忽然想喊日」，搭車時聽歌變成一件好唔理智嘅事，因為聽歌引致想爆喊嘅機會率實在太高。其實就算唔係響「忽然想喊日」，有時我聽歌聽到一啲好應景嘅歌詞，都會好想喊，所以如果撞正「忽然想喊日」，當街抹眼淚嘅情況就會出現，都唔好話唔尷尬，俾人見到實以為你唔知做乜鬼。

不過講開聽歌聽到喊，我一直以為都好平常吓，但係有一日同朋友講起，先知道原來有人係理解唔到點解聽歌可以聽到喊嘅。跟住朋友就同我講，可以俾一首歌感動到喊，係上天送俾雙魚座朋友嘅禮物。我最鍾意就係有咩都賴星座，所以呢個解釋實在太強，超like﹗

講真，聽歌嘅時候，好自然就投入咗響歌詞入面，如果歌詞寫得到位，配合個旋律，真係可以好感動，如果唔係，都唔會有咁多人響五月天演唱會喊啦。

點都好，其實間唔閒時喊吓都唔係一件壞事。感動唔一定來自傷心或者其他負面嘅情緒，你都可以因為一啲好事，例如世界嘅美好，身邊人對你嘅呵護等等而感動。情形就好似洩洪咁，將平時堆堆埋埋嘅情感放咁啲出嚟，個人會輕鬆啲。

其實只要唔係當街當巷，喊都唔係好羞家啫…