無法可修飾的一對手

手作同靚手，到底可唔可以共存呢？

當初整橡皮圖章嘅時候，周不時都會割損手指。到依家整皮東東，縫線嘅時候間唔中都會俾針拮到手指，打磨修邊嘅時候又經常挫到啲指甲，每一次我都會諗，好彩冇搽指甲油，如果唔係真係嘥哂啲心機。近來仲發現，可能因為手指要揸針，縫線後指頭竟然甩皮。

唔講唔知你知唔知，其實我好鍾意靚嘅手。無論男女，我留意一個人，通常都會睇佢對手。由對手嘅骨架，皮膚以至指甲，我都會仔細睇，而我好相信，一個人對手，係會露出佢出身嘅端倪。Anyway，自問自己對手雖然唔係醜，但同靚都仲有一段距離，加上我有搣 / 咬手指皮嘅壞習慣（呢樣嘢係改唔到的），我已經接受咗無論做啲咩，佢都唔會真正「變靚」，極其量只可以美化一下。不過我依然堅持，作為女仔人家，對手就算唔白，都應該儘量滑。

講咗咁耐好似有啲離題。我其實係想表達，做手作嘅「代價」對我好大打擊。但我又唔捨得唔再整手作仔，咁就唯有的起心肝，努力護手﹗

因為近期幾鍾意 L'Occitane 嘅產品，所以見佢新出隻 hand balm 就買咗嚟試吓。我擺咗佢響公司，搽咗兩﹑三日，效果應該冇咁快知，不過個香味就次次都令我精神為之一振。唔好俾佢個 balm 字誤導咗，佢個質地其實有啲似啫喱，皮膚好易吸收，成份根據官網係乳木果油加薰衣草、茶樹同天竺葵3種天然精華油。我一直都覺得，護手霜最重要係夠「吸引」，佢要引到你經常搽完又搽，咁樣效果好難唔好。

呢罐我會留響公司每次洗完手用。我個扮靚達人朋友話會預埋我團購一隻星級護手霜，呢樣我就等佢遲啲再介紹（我一早講過話唔寫扮靚心得架嘛） 。

話時話，係多得台灣宜蘭嘅浮線發想之島（佢係一間民宿嚟），我先知 L'Occitane 香氛療法系列嘅產品係咁正。我響浮線一次過試哂佢嘅洗頭水﹑護髮素﹑沖涼液同潤膚乳液，用嗰時唔係好覺，過咗一陣先發現身體由頭髮至皮膚都散發住一陣非常自然舒服嘅香味，令人心曠神怡，一試難忘。

P.S. 香港終於有得賣 L'Occitane 香氛療法系列嘅潤膚乳液喇﹗