某年某月某日，同一個好朋友傾偈嘅時候，佢介紹我睇一篇龍應台嘅文章，標題係「給河馬刷牙」。我記得我睇完﹑抹乾眼淚之後，將呢篇文print咗出嚟，貼咗響office。我同自己講，我要好好記住佢講嘅說話。
文章裡面，龍應台同自己個仔講︰「在現代的生活架構裡，什麼樣的工作比較可能給你快樂？第一，它給你意義；第二，它給你時間。你的工作是你覺得有意義的，你的工作不綁架你使你成為工作的俘虜，容許你去充分體驗生活，你就比較可能是快樂的。」
然後佢仲話︰「當你的工作在你心目中有意義，你就有成就感。當你的工作給你時間，不剝奪你的生活，你就有尊嚴。成就感和尊嚴，給你快樂。 」
當眼淚流出嚟嘅時候，我肯定自己當時唔多快樂 ，因為我冇時間去做自己鍾意做嘅嘢，一切都係圍住工作轉，經常要加班之餘，亦控制唔到幾時加﹑幾時唔加，時間根本就唔係自己嘅。嗰段時間，響我個標準嚟講已經稱得上係營營役役，係生存以上﹑生活以下。
有時人真係需要當頭棒喝。雖然未至於當頭到要立刻劈炮唔撈，但係暗地裡都已經將心中個priority list重新洗牌，然後同自己講，要堅守自己嘅底線。
我從來都唔相信，一個負責任嘅員工等同一個24小時standby嘅員工。曾經有一個舊老闆同我講，如果你係一個專業嘅律師，你應該願意為工作需要而犧牲自己嘅私人時間。講得好…廢﹗首先，咩為之工作需要先？如果任何工作需要我都要仆到番嚟做嘅話，我同奴隸／賣身有咩分別？而你又點知我私人時間要做嗰件事，唔緊要得過你個「工作需要」？一個好老闆，會幫你好好守住呢條「OT線」，因為佢識得尊重你係一個有自己生活同選擇嘅人。如果你老闆開口埋口就同個客講，話會「24小時隨時為你服務」，而你先係真係做嘢嗰個，朋友，轉工啦（除非你袋份糧係肥到用嚟收買你所有時間，咁就冇嘢好講喇）。
好多人都會覺得自己冇得揀，覺得呢個世界上冇咁筍嘅工。係㗎，冇咁著數嘅事㗎。你要人工高、公司名要夠響、工時要短、老闆又有人性 ﹣ 呢啲咁正嘅工，真係唔存在㗎。所以都係嗰句，要取捨囉。唔係個個都咁好彩，份工本身可以令自己好開心。但係一般普通人，都可以追求一份容許你做令你開心嘅事嘅工，一切都視乎你捨唔捨得放手，用賺少啲錢去換早啲收工，騰番啲時間出嚟做你認為重要嘅事。如果時間真係金錢嘅話，咁調番轉諗，收少啲錢咪可以有多啲時間囉！
乜嘢對你嚟講最重要，只有你自己先知。你要點樣過你嘅人生其實與我無關。只可以講，時間一日一日咁過，有啲嘢依家唔做，遲啲唔會有得補番。你錯過同屋企人、朋友相處嘅時間，你唔理唔理嘅健康，你一直冇實踐嗰個夢想 ﹣ 有一日，當你搵夠賺夠嘅時候，可能已經過咗、冇咗，到時候就算有人可憐你，都唔會有人賠番俾你。
響呢個郁啲就用錢嚟衡量你掂唔掂嘅拜金社會，要逆向咁用錢換時間都需要唔少勇氣。但係如果依家唔勇敢啲去爭取做令你真正開心嘅事，十年八載人老珠黃／中年發福之後，先至發現自己唔知做過啲乜（淨係數得出自己買過啲乜）嘅話，變成mid-life crisis，咁又何必呢。
人係好容易迷失嘅，共勉之啦！
No comments:
Post a Comment