真的喜歡你．．．

我指做手作。

我記得2010年其中一個目標，係學一樣嘢。我揀咗手雕橡皮圖章，冇乜特別原因，純綷係見到教整橡皮圖章嘅書，好似幾得意，最重要係好似唔係太難，就即管試一試。買完一輪材料，手震震咁雕咗第一個章，肉酸到不得之了，見到條線都想像到當時隻手有幾震。不過又真係幾好玩喎，整完之後又好有滿足感，從此，就掉入咗手作嘅深淵喇！

雕吓一個，雕吓又一個

雕完嘅圖章，通常都用嚟做咭﹣生日咭又好，聖誕咭又好，靚唔靚都好，起碼獨一無二，只此一家。只恨我唔識畫公仔，要自創圖案有難度，不過唔理咁多，一於繼續雕！

本本都係自己整㗎

如果冇記錯，開始雕印仔冇耐，就跟一個朋友學整簿﹣即係自己整個簿皮，再加一疊紙，然後變成一本簿。呢位朋友，識佢嘅時候已經有「手工王」嘅美譽，佢嘅一雙巧手，做手工叻之餘，寫出嚟嘅字亦靚到你嘩嘩聲。跟呢位朋友學咗Japanese binding，coptic binding同buttonhole binding。整完啲簿到依家都唔捨得用呀。有興趣嘅朋友，可以上佢個網址睇吓，佢仲有開班，仲有得學㗎！

剛開始上呢啲手作堂嘅時候都要搵朋友一齊柴娃娃一下，但係好快已經唔需要人陪喇。因為響手作嘅世界，只有你同你面前做緊𠴱一件事，根本就唔得閒傾偈，亦唔想分心。𠴱個state，好正。

物以類聚，整咗印仔同簿之後，又有人介紹整皮革小物（我簡稱佢做「皮東東」，因為唔一定係細細件嘅）。唔駛諗，即去學！

好快就發現，整皮東東係另一個天堂。

自從整皮東東之後，好多嘢都唔駛買喇

對我嚟講，皮東東有一種好特別嘅吸引力。整皮好多時都唔需要好大型嘅工具輔助，相對地比較容易響屋企整。另外又可以配合布料做裡，小配件買買埋埋都算容易收納，成件事都好似好理想。

雖然依家算有幾張刀，但係冇張利。我覺得，我依家響手作海度尋找緊我個一生最愛（笑）。

除咗好玩呢個元素之外，我覺得做手作改變咗我嘅價值觀。當你試過從冇到有咁變一樣嘢出嚟之後，你會感受到一種算得上係自我陶醉嘅滿足感。成件事都係你自己嘅，每一個元素要係點都係你自己嘅選擇。思前想後再埋頭苦幹一輪變出嚟嘅作品，我覺得，我真係「愛」佢㗎！

無論係彷彿靈魂出竅地專心𠴱個過程，定係全世界只得一件嘅特性，都令我覺得，用錢就買得到嘅嘢其實唔係好矜貴。又或者咁講，橫掂都買唔起𠴱啲天價嘅限量版，自家製一個別注版過吓癮都好吖！

正經啲講，其實好享受將心思注入一件作品嘅過程。我硬係覺得，用心做出嚟嘅一件手作小物係真係有靈魂嘅。同樣係手造嘅，你係睇得出亦摸得到佢係一件求其地俾人造出嚟攞去賣嘅東西，定係一件心血結晶。況且用自己手造嘅東西做禮物送俾人，就算唔夠靚／貴，至少夠用心同夠特別，冇得輸喎！

你睇吓啲參考書幾精美！