上一站 ﹣ 瑞士 Interlaken

剛剛同屋企人去咗兩個禮拜歐洲，響巴黎米蘭呢兩個朝聖地中間加插瑞士嘅Interlaken因特拉肯 （呢個係瑞士國家旅遊局譯嘅中文名，有香港出嘅旅遊書譯佢做煙特勒根），個人認為，係成個旅程嘅亮點，令我最不枉此行。

旅行之前，我對瑞士嘅認識只限於天氣報告會提起嘅蘇黎世同日內瓦。屋企人話想去瑞士，男友就強烈推介Interlaken，我當時心諗，聽都未聽過喎，邊樹嚟㗎？但係既然佢拍心口話靚，就即管去吓。

咁到底Interlaken響邊度，佢又有咩好呢？

地理上，Interlaken響少女峰地區，位處於兩個湖中間（詳情有興趣嘅話可以去瑞士國家旅遊局嘅網頁研究吓），地方唔係大，火車站得Interlaken West同Interlaken Ost（即係east咁解）兩個咁大把。加一條主要大街（基本上係直路）接駁東站同西站，係咁多。大街上有啲舖頭仔，賣吓朱古力同手信，不過唔好睇佢地方細細，𠴱度有間賭場，驘到大錢嘅話你可以掃哂啲名錶走（有啲舖頭仔有賣珠寶首飾名錶同名牌㗎）。

中間有啲雲𠴱度就係少女峰喇

天氣好時（我去咗3日，日日都好），響大街上一眼就望到少女峰（Jungfraujoch）。少女峰係阿爾卑斯山山脈上嘅其中一個山峰，根據維基百科，佢係同名山脈斷層嘅最高峰。呢個山，坐火車就上到㗎喇！

話說100年前有條友開咗一條火車線上少女峰（Jungfraubahn），從此以後，輕輕鬆鬆坐響度就上到去呢個海拔3454米（即11333尺）高嘅少女峰啦！Interlaken Ost站係上少女峰嘅起點，車站有電視直播山上天氣情況，你可以到時睇住直播決定上唔上山。點解唔可以上咗先算呢？因為呢程火車都幾貴㗎。火車飛來回要大約180瑞朗（我去𠴱時1瑞朗兌緊9蚊港紙），車程仲要5個半鐘（未計中途逗留時間），所以可以揀的話，梗係等山上天氣好先上啦。

Kleine Scheidegg中途站，靚得佢吖

由Interlaken Ost出發，可以選擇經Lauterbrunnen或者Grindelwald上去Kleine Scheidegg，之後轉乘少女峰鐵路上少女峰站。好似有少少複雜？唔駛慌，Interlaken周圍都有呢程火車嘅資料單張（全彩色，好似一本書仔咁），單張上有詳盡嘅火車時刻表。雖然要轉幾次車，但係除非你四圍貢買嘢食搵厠所，否則係唔會miss嘅。就算真係miss咗，下一班車30分鐘後會再開，仲開得好準時添。

一路上，可以用「風光如畫」嚟形容。綠油油嘅山坡上一間間傳統屋仔，間唔中會見到條頸掛住一個大啷啷（牛鈴）嘅瑞士牛牛同羊羊，令你即時想唱番首"yor-yee-yor-yee-yor-hee-hoo"飄零燕應吓景。係上咗少女峰鐵路之後，反而會冇景欣賞，因為有一段係穿過個山嘅隧道嚟，黑麻麻，可以眠一眠。

成7個半瑞朗一個㗎！

上到山上，有觀景台同餐廳，你可以透過玻璃欣賞少女峰峰上嘅景色。再唔係，你亦都可以行出去同個山頭埋身肉搏。宣傳單張話有好多嘢可以玩（例如滑吓雪），但當然一切睇天氣做人啦。我去𠴱日，一路上都好好天，但係山上原來落緊大雪，真係估佢唔到（山下氣溫有27、28度），除咗凍到變雪條之外，視野亦都好有限，一片白濛濛。所以我係咁易出去行咗幾步過吓癮就算喇。番到入觀景台，可以買吓手信，有時間仲可以寫張postcard寄俾朋友（自己都得）。響山上寄的話（手信舖賣埋郵票），個郵截寫住“Jungfraujoch 3454m”，又靚又有紀念價值！

話時話，瑞士人都幾識做生意，除咗手信舖有郵票賣之外（雖然行過兩步有郵局），food court竟然有得賣杯麵，仲要係辛辣麵添！個個行完出去凍到牙關打顫，入到嚟有個熱辣辣嘅麵，𠴱種感覺真係好幸福，所以就算係貴到阿媽都唔認得，都乖乖俾錢。食完之後，我媽子形容，個身係由入面（即係條食道同個胃）暖出嚟，當堂舒服哂，貴都抵呀！

簡單嚟講，山上有得玩、有得食，玩到夠皮就落山。如果上山時經Lauterbrunnen，落𠴱時可以揀經Grindelwald，叫做有啲變化。

Grindelwald同Lauterbrunnen相類似，都係一個簡單嘅小鎮（即係一個火車站加一條大街），夏天嘅時候，除咗手信之外好多舖頭都係賣行山用品。其實Grindelwald同Interlaken距離好近，行落去都得。雖然我當日係搭火車落去嘅，但係根據可靠情報，行都應該係兩個鐘嘅事。一路行，仲可以一路唱飄零燕，一路望吓啲牛羊食草，聽吓佢哋身上掛𠴱個牛鈴發出嘅啷啷聲，享受一下簡單而寧靜嘅美好。

呢片少女峰地區，有好多小鎮可以俾你住（例如Lauterbrunnen同Grindelwald)，而除咗少女峰鐵路之外，唔同地方都會有啲纜車、行山徑之類嘅嘢俾你玩，亦有其他山峰俾你上，所以你想玩三兩日又得，玩足一個禮拜亦冇難度。

唔似得去大城市，去Interlaken，Lauterbrunnen呢啲地方，冇景點要chur，亦唔會驚蕩失路，成個人可以真真正正咁放鬆一吓。名符其實係好山好水，抬頭係大片藍天白雲，湖水／河水都清澈見底，地上唔係樹就草，唔係草就係花。石屎只限於車行嘅馬路，家家戶戶都將家門種滿花草。個天9點都未黑齊，冇見過人趕時間。身處其中，你會真正感受到，個世界其實好大，仲有好多唔同嘅生活方式同態度。呢度當家作主嘅係簡單嘅自然美，索入去𠴱啖清新嘅空氣，響香港有錢都買唔到。

Lauterbrunnen一隅

總括來講， 下次去歐洲，可以的話都會經一經瑞士。其實瑞士同法國、意大利、德國同奧地利接壤，既然坐得咁多個鐘頭飛機去歐洲，如果本身已經諗住去呢四國其中一度（或幾度），點解唔去埋呢？